Enco Mareska thotë se Ben Çiluell dhe Kerni Çukvuemeka ka të ngjarë të jenë lojtarët e parë të Çelsit që kërkojnë të largohen në janar, për shkak të mungesës së kohës së tyre të lojës.
Mbrojtësi i majtë i Anglisë ka bërë vetëm një paraqitje këtë sezon, e cila erdhi si zëvendësues në pjesën e parë në fitoren 5-0 ndaj Berrout në Kupën Karabao. Ndërkohë, Çukvuemeka është kufizuar me paraqitjet si zëvendësues në Ligën e Konferencës.
Përpara ndeshjes me Evertonin në dielën, Mareska tha:
“Ndoshta ata janë të parët që duan të largohen, sepse stërviten çdo ditë, sepse duan të luajnë dhe nëse nuk luajnë, ndoshta po mendojnë të largohen. Ne do të shohim nëse disa prej tyre do të vijnë të trokasin në derë për të thënë ‘unë dua të largohem’”.
