“Po të shohim 15 vitet e fundit, ky është momenti më i mirë në historinë tonë”. Enrique Cerezo, presidenti i Atlético Madridit, po shijon momentin e klubit të tij, i cili është i pari në renditjen e La Liga-s.
Numri një i klubit kuqebardhë, i intervistuar nga “AS”, bëri bilancin e viteve të fundit: “Kemi fituar kampionate, kemi arritur finale të Ligës së Kampionëve dhe jemi rritur në aspektin social. Sot jemi më të mëdhenj në çdo aspekt”,
Shumë merita i takojnë Diego Simeone: “Nuk kam dyshuar kurrë për të, sepse sezonet janë shumë të gjata dhe rëniet e skuadrës mund të ndodhin në çdo moment. Na ndodhi edhe ne në fillim të sezonit, por u rikuperuam. Jemi aty ku jemi falë trajnerit tonë dhe lojtarëve tanë. Kemi besim të plotë te Simeone”.
Për Antoine Griezmann, i cili është përmendur si mundësi largimi në fund të sezonit, Cerezo thotë: “Nuk e di se cili do të jetë sezoni i fundit i Griezmann, as i imi… Ajo që mund të them është se Antoine Griezmann është një lojtar shumë i rëndësishëm në skuadrën e Atlético Madridit.
Ai nuk është vetëm një lojtar shumë i rëndësishëm për Atlético Madridin, por gjithashtu në të gjithë Europën. Për mua është ndër pesë lojtarët më të mirë në Europë. Ai është një kampion i madh dhe e ka klubin tonë në zemër”.