“Një moment ndryshimi”.
Kështu e përshkruan situatën aktuale të Juventusit ish-numri 10 bardhezi, Alex Del Piero, gjatë një interviste për “Gazzetta dello Sport”.
Ai vazhdon: “Gjërat shkuan mirë në fillim, por më pas erdhën këto barazime që kanë nxitur diskutime, sepse ishin të shumta. Me fitoren e fundit (2-1 ndaj Monza) atmosfera u gjallërua. Edhe në Champions League gjërat po ecin mjaft mirë”.
A janë vështirësitë të lidhura me ndryshimin në drejtimin teknik? Del Piero përgjigjet: “Realiteti është se pritshmëritë te Juventusi janë gjithmonë të larta. Gjithmonë. Është e kotë të bëjmë sikur nuk e dimë. Historia ka një rrugëtim dhe një peshë të saj. Kjo vlen për Juventusin, por edhe për Milanin, që po kalon një moment të ngjashëm.
Gjithmonë ndryshimet e trajnerëve bëhen me dëshirën për të bërë diçka më shumë, sepse ndryshimet sjellin entuziazëm, por kur rezultatet mungojnë, ka zhgënjim. Është normale… Historia e Juventusit është kjo dhe nuk po e shpikim tani. Megjithatë, sezoni ka filluar vetëm prej pak muajsh dhe ka ende shumë kohë përpara”.
Konkretisht, për Thiago Motta thotë: “Si trajner nuk e kam pasur kurrë dhe, për këtë arsye, nuk mund të flas për të. Në këmbim, e kam sfiduar shumë herë si futbollist. Ishte shumë këmbëngulës, por kishte mbi të gjitha aftësi të mëdha teknike dhe një vizion të jashtëzakonshëm të lojës. Nëse ai arrin t’i transmetojë këto veti nga fusha te stoli, do të jetë diçka e madhe”.
Në fund, mbi garën për titullin: “Juventusi është aty, ende ‘gjallë’, por me ritmin e deritanishëm, me barazimet e shumta, kreu do të jetë mision tepër i vështirë. Nëse rivalët nuk gabojnë rrugës, nuk është më asgjë në dorën e Juventusit”.
