Kalimi nga Arsenali te Bayer Leverkuseni i Granit Xhakës fillimisht u prit me skepticizëm të madh.
Mesfushori nga Kosova bënte paraqitje të nivelit të lartë me “Topçinjtë” e njëjtë vazhdoi edhe me Bayer Leverkusenin e drejtuar nga Xabi Alonso.
Madje, viti 2024 hyri në historinë e këtij klubi gjerman.
Për herë të parë ndonjëherë, Bayer Leverkusen u shpall kampion, duke e ndalur mbretërimin shumëvjeçar të Bayern Munichut.
90 pikë me 28 fitore, gjashtë barazime dhe asnjë humbje ishte bilanci i jashtëzakonshëm i “farmaceutikëve”.
Xhaka me Florian Ëirtz e me shokët e tyre ishin në qendër të vëmendjes së futbollit evropian me paraqitje të shkëlqyera, teksa gjatë gjithë sezonit pësuan vetëm një humbje, atë në finalen e Ligës së Evropës ndaj Atalantas.
Paraqitjet fantastike në mesfushë të Xhakës bënë që ai të nominohej për Topin e Artë, teksa përfundoi si lojtari i 16-të më i mirë në botë
Bayern Munich e mbylli sezonin në vendin e tretë dhe bashkë me Leverkusenin, Stuttgartin, Leipzigun dhe Dortmundin u kualifikuan në Ligën e Kampionëve.
Në Ligën e Evropës shkoi Eintracht Frankfurti me Hoffenheimin, kurse në Ligën e Konferencës u kualifikua Heidenheim.
Nga Bundesliga ranë Darmstadt dhe Koln, kurse u promovuan St. Pauli dhe Holstein Kiel.
Në sezonin e tij të parë në Bundesligë me Bayern Munchun, Harry Kane nuk fitoi trofe, por u shpall golashënuesi më i mirë i sezonit.
Sezoni i jashtëzakonshëm i Bayer Leverkusenit vazhdoi me një tjetër trofe pas Bundesligës.
Granit Xhaka ia solli trofeun e dytë sezonal ekipit të tij, pasi shënoi golin e vetëm të finales ndaj ekipit nga Bundesliga 2, Kaiserslautern.
Ishte kjo një tjetër dëshmi se sezoni i Bayer Leverkusen do të hynte në histori të klubit si larg më i suksesshmi deri më tani.
As lojtarët e as trajneri nuk u larguan nga Bayer Leverkuseni në afatin kalimtar të verës dhe së bashku, e nisën sezonin me një tjetër trofe.
Xhaka me shokë triumfuan në finale të Superkupës së Gjermanisë, duk fituar në penallti ndaj Stuttgartit, teksa koha e rregullt kishte përfunduar baraz 2:2.
Me boshtin e skuadrës të ruajtur dhe me trajnerin Xabi Alonso, Bayer Leverkusen do të synojë sërish trofe në vitin 2025.
