Trajneri Arne Slot ka ulur euforinë në lidhje me shanset që skuadra e Liverpool të fitojë Premier League. Edhe pse “reds” kryesojnë renditjen e Premier League me 6 pikë avantazh ndaj Arsenal ai shprehet se në këtë kampionat situata mund të ndryshojë sa “hap e mbyll sytë”.
“Nëse jeni në këtë sport prej kaq shumë vitesh, ju e dini se nuk mund të bësh parashikime kur keni ende edhe 20 ndeshje për të luajtur. Nuk e mohoj që jemi në pozitiva të mira, por sezoni është ende i gjatë, duke konsideruar edhe Europën në mes”, tha Slot.
“Ka shumë sfida përpara. Dy muaj më parë ne ishim një pikë prapa City dhe shikoni se çfarë ka ndodhur atje për sa i përket lëndimeve. Kjo mund t’i ndodhë çdo skuadre. Është shumë herët për të festuar, por sigurisht që është mirë për ne jemi të parët.
Nuk mendoj se ka pasur ndonjë fitore të lehtë për ne në të gjitha këto ndeshje”, shtoi Slot.
“Kjo është arsyeja pse ne duhet t’i marrim ndeshjet një nga një. Është e rëndësishme të fitosh, pasi kështu do të bësh hapat që duhen për të fituar në Premier League. Renditja është diçka për të cilën ne jemi të vetëdijshëm, por ne gjithashtu e kuptojmë se sa lojëra janë ende për të luajtur”, deklaroi Arne Slot.
