Agjenti i Dani Olmo, Andy Bara, ka dhënë një intervistë për “GiveMeSport”, ku ka ndarë detaje mbi situatën aktuale të lojtarit dhe të kaluarën e tij në merkato.
Aktualisht, Olmo është jashtë liste te Barcelona për shkak të kufizimeve të vendosura nga La Liga, pasi licenca e tij e regjistrimit ka skaduar më 31 dhjetor dhe nuk është rinovuar deri në fund të sezonit.
Përpjekjet e klubit katalanas për ta rregulluar situatën nuk kanë dhënë rezultat deri më tani.
Bara tregoi mbështetjen e tij për Barcelonën dhe presidentin Joan Laporta, duke shprehur besim të plotë në projektin e klubit katalanas: “E respektojmë Laportën dhe Decon. Ata kanë bërë një përpjekje të madhe për ta marrë Dani verën e kaluar. Projekti i tyre është ndër më të mirët për të ardhmen dhe besojmë se Barça do të fitojë shumë tituj, si në epokën e Messit. Dani, familja e tij dhe unë kemi dashur që ai të jetë pjesë e Barcelonës”.
Lidhur me pengesat e krijuara nga La Liga, ai shtoi: “Mund të duket çudi, por jam i qetë. Besoj te Laporta dhe Deco, jam i sigurt që do ta gjejnë një zgjidhje për Danin. Barça është një klub i madh dhe do ta përballojë këtë sfidë. La Liga duhet ta ndihmojë, në vend që të përhapë lajme që Dani nuk është i disponueshëm për kombëtaren. Jam i bindur se Dani do të jetë te Barça për shumë vite, ndihet i lumtur aty”.
Bara gjithashtu zbuloi një prapaskenë nga e kaluara, kur Olmo ishte afër transferimit te Bayern Munich, në kohën kur luante për Dinamo Zagreb: “Kur Dani ishte te Dinamo, Bayerni ofroi më shumë para dhe marketingu i tij ishte më i madh.
Gjithsesi, ne i dhamë fjalën Leipzigut dhe Oliver Mintzlaff, të cilët na paraqitën një projekt sportiv të qartë. Nuk është gjithmonë paraja, ajo që ka rëndësi, as në jetë dhe as në futboll”.
