Të dielën, më 5 janar, do të zhvillohet një ndeshje madhështore në Premier League; Liverpool-Manchester United.
Një tjetër udhëkryq i rëndësishëm, që mund t’i konsolidojë sërish “Reds” në krye të renditjes, ose t’iu shkaktojë një ndalesë, e cila do t’iu jepte përparësi ndjekësve të drejtpërdrejtë për titullin.
Sidoqoftë, ky rrezik nuk duket se e shqetëson Arne Slot, trajnerin e të kuqve, sa i përket supersfidës kundër “Djajve të Kuq”.
“T’i kursejmë lojtarët e Manchester United?
Jo. Sigurisht që nuk do të planifikojmë gjëra të tilla. Për mua, ata kanë lojtarë shumë më të fortë sesa mund të sugjerojë renditja e Premier League për momentin.
Mund të duhet pak kohë që Ruben Amorim të nxjerrë në pah të gjitha këto cilësi nga lojtarët, por ata janë shumë më të mirë sesa tregon klasifikimi”, – komentoi holandezi në një konferencë për shtyp.
Për gjendjen e skuadrës shtoi: “Joe (Gomez) nuk është në një situatë të mirë, sa i përket dëmtimit të tij, do të mungojë për disa javë. Conor (Bradley) dhe Ibou (Konaté) do të stërviten me ne sot për herë të parë.
Ata kanë punuar shumë për t’u rikthyer në dispozicion të skuadrës. Hapi i ardhshëm është të shohim se si do t’i menaxhojnë seancat e stërvitjes në grup”.
Një mendim edhe për Virgil van Dijk: “Lojtarët më të mirë në botë kanë shumë atribute të shkëlqyera. Virgil ka një inteligjencë loje të pabesueshme. Ai di të presë momentin e duhur për ta luajtur topin mes linjave.
Po bën një punë të jashtëzakonshme për ne. Ai e udhëheq skuadrën nga fillimi deri në fund, sjell shumë energji pozitive në grup. Ka bërë vërtet mirë, por ky është standardi i këtij klubi. Ai duhet të vazhdojë të qëndrojë në këtë nivel”.
