Trajneri i Marseille, Roberto De Zerbi, ka thënë se Ligue 1 është shumë më e fortë nga sa vlerësohet jashtë vendit.
Ligue 1 prej kohësh shihet si më e dobëta ndër ligat kryesore të Evropës – Angli, Spanjë, Gjermani dhe Itali – ndërsa klubet e saj shpesh kanë dështuar në garat ndërkombëtare. Gjithashtu, liga është dëmtuar nga një marrëveshje transmetimi që sjell të ardhura shumë më të ulëta në krahasim me rivalët e saj.
“Mendoj se Ligue 1 nuk është promovuar aq mirë (si produkt) dhe nuk ka të njëjtin shkëlqim si Premier League, e cila është liga më e mirë në Evropë, apo Serie A, La Liga dhe Bundesliga,” tha De Zerbi.
Trajneri italian është shprehur se mungesa e ekspozimit mediatik jashtë vendit dëmton reputacionin e kampionatit francez. “Nuk e di nëse është menaxhuar keq apo thjesht është keqpromovuar jashtë vendit. Në Itali, për shembull, askush nuk mund të shohë ndeshjet e Marseille dhe kjo është për të ardhur keq”, ka thënë tekniku italian.
De Zerbi gjithashtu ka theksuar se lojtarët e Ligue 1 shpesh transferohen për të luajtur në kampionate më të vlerësuara si Anglia dhe Gjermania.
“Franca është një vend që e dashuron futbollin. Është për të ardhur keq që jashtë nuk vlerësohet për atë që ofron”, ka thënë De Zerbi.
