Shkëndija e Tetovës tashmë disa ditë ka nisur përgatitjet për stinorin pranveror.
Përgatitjet po shkojnë sipas planit, mirëpo habit qetësia në këtë klub kur janë në pyetje transferimet e mundshme, e që priten me shumë entuziazëm nga tifozët e flaktë të kësaj skuadre.
Edhe përkundër largimeve të portierit Davor Taleski, mesfushorit Valon Ahmedi, dhe sulmuesit Daouda Bamba, drejtuesit ende nuk kanë reaguar për të plotësuar vendet e tyre.
Nga ajo që mëson “infOSport.mk”, në ekipin e parë është transferuar gardiani 17-vjeçar, Onur Beshir, një portier ky me mjaft perspektiv, që aktualisht është pjesë edhe e përfaqësueses U18 të Maqedonisë.
Fiziku i tij, e mbi të gjitha cilësitë që posedon ky portier me origjinë nga Ohri, kanë bërë që drejtuesit t’i besojnë një vend edhe në ekipin e parë, ndërsa bazuar në konkurrencën që ka për momentin, i njëjti shumë lehtë mund të ndodh që edhe të marrë vëmendjen e trajnerit Jeton Beqiri.
Ky i fundit gjatë stinorit vjeshtorë në portë preferoi Astrit Amzain, gjë kjo që shkaktoi pakënaqësi te portieri numër 1, Davor Taleski, i cili menjëherë pas përfundimit të stinorit vjeshtor kërkoi largimin e tij nga skuadra.
Ai tashmë ka gjetur edhe ekipin e tij të ri, duke u vendosur për Vardarin, ndërsa mbetet të shihet se kush do të zë vendin e tij, pasi realisht Shkëndija ka nevojë edhe për një portier shtesë.
Ndër emrar e lakuar, është edhe ai i Riste Jankov, që javë më parë prishi kontratën me Tikveshin.
