Përveç yjeve të spikatur që kushtojnë miliona euro, Manchester City ndjek me vëmendje dhe talentet e rinj dhe nuk ngurron të paguajë shifra të frikshme për transferimin e tyre.
Kampioni në fuqi i Anglisë po përgatit një ofertë prej 40 milionë eurosh për Vitor Reis që luan për Palmeiras.
Mbrojtësi 18-vjeçar konsiderohet si një nga lojtarët e rinj më premtues në Amerikën e Jugut dhe ka ngjallur interesin e shumë klubeve të mëdha europiane.
Palmeiras ka vendosur çmimin 30 milionë euro për kartonin e tij, por City është i gatshëm të paguajë deri 40 milionë euro duke përfshirë në marrëveshje edhe bonuse të tjera që mund ta bëjnë më të lehtë negocimin mes palëve.
Në vitin 2022, Reis nënshkroi kontratën e parë si profesionst dhe që nga ai moment ka pasur rritje të ndjeshme duke u kthyer në një nga pikat kyçe në mbrojtjen e Palmeiras. Ndikimi i tij nuk ka kaluar pa u vënë re, dhe në vitin 2023, ai u përfshi nga The Guardian në mesin e lojtarëve më të mirë të lindur në vitin 2006.
Reis do të jetë një bast i fortë për Guardiolën, i cili e ka kërkuar me ngulm, por ende nuk dihet nëse do përfshihet direkt në ekipin e parë të “Qytetarëve” apo do huazohet për të marrë më shumë përvojë diku tjetër.
