Numërimi mbrapsht për “El Clasico” e Superkupës Spanjolle ka filluar. Baalafaqimi Real Madrid-Barcelona do të jetë i treti i epokës Flick në stolin katalanas. Deri tani, trajneri gjerman ka pasur sukses absolut ndaj madrilenëve.
Fillimisht fitoi 2-1 në turin amerikan, më pas triumfoi 4-0 në “El Clasico” e La Liga-s, brenda në “Bernabeu”, kështu që nesër synon trofeun në përballjen “e tretë të vërtetë”.
Flick deklaroi para mediave, në konferencën për shtyp: “Real Madridi është një nga ekipet më të mira në botë, por jemi të përgatitur për këtë finale. Duhet t’i minimizojmë gabimet, sepse ata mund të shfrytëzojnë çdo mundësi”.
Për këtë finale, trajneri gjerman mund të llogarisë Olmo dhe Pau Víctor: “Olmo mund të luajë, nuk ka asnjë problem. Ai do të kthehet në ekip. Ka pasur zhurmë nga jashtë, ndaj duhet të jemi të bashkuar dhe të fortë”.
Përveç kësaj, pas ndëshkimit të Iñaki Peña në gjysmëfinale, hapet një derë për dyshime në mbrojtjen e portës: Szczęsny apo Iñaki Peña. “Iñaki ka luajtur një pjesë të parë sezoni fantastike. Në Spanjë ka një mentalitet ndryshe. Nga jashtë të gjithë japin mend, të gjithë janë profesionistë. Janë ndeshje speciale dhe duhet të jemi të përgatitur”.
Trajneri i Barcelonës nuk është i shqetësuar për ndëshkimin me dy ndeshje të Vinicius për incidentin në “Mestalla”: “Nuk është vendimi im. Është mirë që ai do të jetë në Superkupë. Të gjithë duan të shohin lojtarët më të mirë. Kjo është një ‘El Clasico’ dhe finale Superkupe. Nëse e fitojmë këtë, do të kemi më shumë besim për pjesën tjetër të sezonit”.
Ajo që funksionon nuk preket dhe 4-0 në “Bernabeu” la një kujtim të mirë për trajnerin gjerman, kështu që nuk duket se Flick do ta shtyjë linjën mbrojtëse: “Bëmë shumë mirë në Madrid dhe në pjesën e parë të sezonit, kështu që nuk ka dyshime për të luajtur ndryshe”.
Në fakt, trajneri është shumë i kënaqur me punën e ekipit deri tani: “Për ne, ky ka qenë një sezon i shkëlqyer, në përgjithësi. Për mua, e rëndësishme është të jemi të bashkuar në çdo situatë dhe të punojmë si ekip”.
Nëse fiton, Barcelona do të qëndronte si ekipi me më shumë Superkupa të Spanjës, duke arritur në 15 të tilla, në të kundërt Real Madridi do ta barazonte (të dyja skuadrat do të kishin nag 14 trofe të tillë), diçka që nuk e shqetëson fare gjermanin: “Statistikat nuk më interesojnë”.
Në ditët e fundit është folur shumë për atë që mund të ndodhë me Araújo, por Flick nuk e merr parasysh një mundësi largimi të tij në merkaton e dimrit: “Ai tani është i fortë dhe mundësi shtesë për ne. Për mua nuk ka asgjë për të diskutuar, e dua në ekipin tim, sepse është një nga mbrojtësit më të mirë”.
