Sapo kanë përfunduar 4 ndeshje të vlefshme për javën e 18-të të Kategorisë së Parë.
Vora nis vitin 2025 me fitore.
Skuadra e Bellait mposht 3-2 Kastriotin dhe ruan e vetme kreun e renditjes, tashmë në kuotën e 44 pikëve.
Vora kalon në avantazh të trefishtë, ndërsa Kastrioti zgjohet vonë dhe shënon 2 gola në fund të takimit.
Edhe Flamurtari ka nisur me fitore vitin e ri. Vlonjatët kanë mposhtur në shtëpi 3-0 Korabin dhe pas këtij suksesi ngjiten në kuotën e 42 pikëve në vendin e dytë në renditje. Shkurtaj ka qenë protagonist me një dygolësh, ndërsa rrugën e rrjetës e gjen edhe Selimi.
Zhgënjen Besa, që ndalet në një barazim 1-1 në Rrogozhinë nga Burreli. Matjanët mbyllin pjesën e parë në avantazh falë golit të Ferrukut, ndërsa Nurja shënon për kavajasit në pjesën e dytë. Nuk feston dot në debutim trajneri Çela, ndërsa Besa largohet disi nga dy skuadrat e kreut dhe mbetet në vendin e tretë me 39 pikë.
Zhgënjen edhe Apolonia, që nuk arrin të marrë më shumë se një pikë përballë Valbonës në shtëpi. Mbyllet në barazim pa gola 0-0 sfida në “Loni Papuçiu”.
