Vincent Kompany, trajneri i Bayern Munich, foli në konferencë për shtyp në prag të ndeshjes kundër Hoffenheimit, duke ndarë mendimet e tij për Leon Goretzka dhe situatën e ekipit që drejton:
“Realiteti është që performanca jonë kundër Gladbach ishte shumë e mirë. Kjo e bën të lehtë të lavdërosh çdo lojtar, sepse e meritonin. Gjëja e rëndësishme është që ne mund ta përdorim gjithë ekipin.
Na duhej Leon dhe ai bëri një punë të shkëlqyer. Kjo nuk do të thotë që një lojtar tjetër nuk ka bërë mirë. Për mua, nuk është e rëndësishme kush luan nesër ose në 10 ndeshjet e ardhshme. Më e rëndësishmja është performanca e ekipit”.
Për Musiala: “A do të jetë i gatshëm për të luajtur që nga minuta e parë? Nuk është ende e sigurt kjo. Do ta konsideronim diçka pozitive nëse do të ishte pjesë e ekipit”.
Mendimi për Michael Olise: “Ai është një lojtar ‘cerebral’, një mendimtar. Analizon shumë dhe e vë gjithçka në diskutim. I pëlqen futbolli dhe punon shumë. Gjëja më e rëndësishme që shoh tek ai është obsesioni për punën. Kemi disa lojtarë që duan të mësojnë më shumë. Kjo na jep energji.
Ai është një nga ata lojtarë që gjithmonë dëshiron të përmirësohet”.
Rikthimi i Ito dhe Palhinha: “Ito ka pasur një dëmtim të komplikuar, prandaj nuk dua t’i vendos shumë presion. Shpresojmë ta shohim në fushë brenda 6-8 javëve të ardhshme. Do t’i japim të gjithë kohën dhe pushimin e nevojshëm.
Gjërat po duken mirë për Joao, i cili mund të kthehet brenda 2-3 javëve të ardhshme. Nuk jemi shumë larg që të kemi një skuadër të plotë dhe të shëndetshme. Edhe Josip Stanisic është shumë pranë rikthimit”.
