Trajneri i Liverpoolit, Arne Slot, ka shprehur bindjen se skuadra e tij meritonte më shumë pas barazimit 1-1 ndaj Nottingham Forest të martën në Premier League.
Trajneri holandez ka theksuar se skuadra e tij ka krijuar raste të mjaftueshme për të marrë fitoren.
"Nuk ka shumë ekipe që mund të krijojnë kaq shumë raste kundër një kundërshtari kaq të fortë në mbrojtje. Fatkeqësisht, nuk arritëm të shënojmë një të dytë", ka deklaruar Slot.
Në përballjen e fundit mes dy ekipeve, Liverpool kishte hasur vështirësi për të krijuar raste, por këtë herë trajneri holandez theksoi përmirësimin e dukshëm. "Sigurisht që ishim më të mirë se herën e fundit kur luajtëm kundër tyre. Atëherë nuk krijuam shumë, por sot bëmë shumë më tepër", është shprehur ai.
Slot e ka pranuar se gjysma e dytë e sezonit është gjithmonë më e vështirë për skuadrat pretendente. "Për të fituar ndeshje në gjysmën e dytë të sezonit është më e vështirë. Ekipet mësohen me mënyrën si luan, përmirësohen, mund të sjellin lojtarë të rinj apo trajnerë të rinj, dhe luftojnë për çdo pikë."
Pavarësisht barazimit, Slot e ka vlerësuar karakterin e ekipit të tij, i cili ka arritur të reagojë dhe të barazojë rezultatin pas disavantazhit të hershëm. "Për ne, fakti që e përmbysëm rezultatin tregon karakterin dhe cilësinë që ka ekipi", është shprehur ai.
Trajneri i Liverpool ka theksuar nevojën për të shmangur rastet kur skuadra nuk merr atë që meriton. "Duhet ta shmangim zakonin e mosmarrjes së asaj që meritojmë, sepse ndodhi kundër Tottenham dhe ndodhi edhe tash", ka thënë ai.
