Trajneri i Manchester United, Ruben Amorim, tha të mërkurën se mënyra se si skuadra e tij ka luajtur për të marrë rezultate kundër Liverpool-it dhe Arsenal-it nuk është e qëndrueshme.
Dy muaj pasi mori drejtimin e United, skuadra ndodhet në vendin e 14-të në ligë. Megjithëse kanë treguar shkëlqim me fitoren 2-1 kundër Manchester City-t, barazimin 2-2 me Liverpool-in dhe fitoren ndaj Arsenal-it në Kupën FA pas penalltive me vetëm 10 lojtarë, mungesa e vazhdimësisë e shqetëson trajnerin.
“Po, jam gjithmonë i shqetësuar sepse nuk kemi pasur, gjatë këtyre ndeshjeve, vazhdimësi në performancë dhe rezultate. Prandaj, gjithmonë jam i shqetësuar,” tha Amorim për gazetarët të mërkurën.
“Ndeshja e ardhshme do të më mësojë më shumë për lojtarët e mi sesa dy të fundit… tifozët do të presin më shumë nesër. Duhet të japim më të mirën.”
“Vitet e fundit nuk kemi fituar kampionatin. Në të kaluarën, këtu nëse nuk e fitoje kampionatin një vit, duhej ta fitoje vitin pasardhës. Nuk ndiej atë lloj presioni,” shtoi portugezi.
“Kur ke presionin për të fituar, ky është presioni që dëshirojmë. Ndonjëherë është e vështirë. Kundër Arsenal-it dhe Liverpool-it, askush nuk priste që ne t’i mundnim ato skuadra, por tani duhet të jemi të përgatitur për atë presion. Na nevojitet ky presion si skuadër dhe ta përballojmë lojën si duhet.”
Gjithsesi, 39-vjeçari pranoi se do të duhet kohë që skuadra të luajë sipas vizionit të tij.
“Nuk kalojmë shumë kohë gjatë lojës në të tretën e fundit të fushës me topin,” tha ai.
“E kuptoj që tani është në rregull të luajmë kështu kundër Liverpool-it dhe Arsenal-it… por në të ardhmen nuk mund të luajmë kështu, dhe unë e di këtë. Por na duhet kohë për të ndërtuar një mënyrë tjetër loje. Në të ardhmen, do të fokusohemi shumë në këtë aspekt.”
Megjithatë, Amorim refuzoi të përgjigjej për të ardhmen e sulmuesit Marcus Rashford, i cili nuk ka luajtur që nga 12 dhjetori mes thashethemeve për një largim.
“Unë dua vetëm të fitoj nesër. Fokusi im është të fitojmë nesër; do të zgjedh lojtarët që mendoj se janë më të mirë për ta fituar ndeshjen nesër. Jam i përqendruar vetëm në këtë,” tha trajneri.
