Dinamo kaloi pa probleme në çerekfinalen e Kupës së Shqipërisë, me ekipin e Ilir Dajës që arriti të triumfonte 6-1 ndaj Erzenit të Kategorisë së Parë. Një fitore që nuk festohet gjatë nga dinamovitët, pasi një tjetër duel mjaft i rëndësishëm i pret në fundjavë.
Kundërshtari i radhës është Elbasani, sigurisht një rival shumë herë më i vështirë se Erzeni dhe për këtë te “Blutë” janë të vetëdijshëm.
Daja do të zbresë sot ekipin në fushë për të nisur edhe zyrtarisht përgatitjet për këtë duel.
Për timonierin e dinamovitëve ka lajme të mira dhe të këqija. Kjo pasi një lojtar rikthehet dhe një tjetër do të mungojë. Ndaj verdhebluve Daja mund të mbështet edhe te Jorgo Meksi, ndërsa nuk do të mund të llogaritë shërbimet e Lorran, i cili ka probleme shëndetësore dhe ende nuk është gati për të zbritur në fushë.
