Tottenham është i vendosur për të forcuar mbrojtjen për sezonin e ardhshëm dhe i ka vënë sytë tek Alessandro Bastoni, qendërmbrojtësi i Inter-it.
Pavarësisht tentativave të dështuara në merkatot e mëparshme, Spurs besojnë se vera e ardhshme mund të jetë momenti kyç për t’iu afruar sërish italianit, i cili është kthyer në një pjesë të pazëvendësueshme në skemën e Simone Inzaghi-t.
Bastoni është një lojtar vendimtar tek zikaltrit dhe konsiderohet si një nga qendërmbrojtësit më të mirë në botë. Inter nuk do ta ketë të lehtë të heq dorë nga një nga futbollistët më të mirë që ka në dispozicion, por nuk është hera e parë që klubi zikaltër “lëshon” yjet për oferta shumë të larta.
Interesi i Tottenham për Bastoni-n nuk është i ri. Fabio Paratici, ish-drejtori sportiv i klubit, duke shfrytëzuar lidhjet e tij në futbollin italian që dhanë fryte me nënshkrime të tilla si Cristian Romero, u përpoq të nënshkruante me mbrojtësin zikaltër në të kaluarën, por pa sukses.
Gjithsesi, te Tottenham nuk janë dorëzuar dhe këtë herë janë gati t’i ofrojnë klubit zikaltër 80 milionë euro si dhe një dyfishim të rrogës për italianin, në krahasim me atë që merr aktualisht. Vera e ardhshme pritet të jetë e “nxehtë” për dy klubet, ku negocimet e para kanë filluar që tani.
