Këshilltari i Milanit, Zlatan Ibrahimoviç, ka konfirmuar bisedimet me Manchester City për Kyle Walker, por ka paralajmëruar Juventusin se Fikayo Tomori ‘është lojtar i Milanit dhe Sérgio Conceição e pëlqen shumë.’
Gjatë intervistës së tij para ndeshjes me Juventus për DAZN, Ibrahimovic nuk mundi të shmangte pyetjet për merkaton e transferimeve, veçanërisht për negociatat për të marrë Walker në huazim nga Manchester City me mundësi blerjeje për 6 milionë euro.
“Të gjithë e dinë që Walker është një lojtar i madh, ka bërë gjëra të mëdha te Manchester City, ka luajtur për Tottenham dhe Anglinë. Kur një lojtar si Walker është në treg, do të ketë shumë interes,” pranoi Ibrahimoviç.
Duke qenë se ai është 34 vjeç, a është nënshkrimi i një mbrojtësi kaq veteran kundër strategjisë së deklaruar të Milanit për këtë sezon?
“Nuk është kundër vizionit apo strategjisë sonë, sepse ai është një lojtar shumë i fortë, një lider në dhomën e zhveshjes dhe po përpiqemi të verifikojmë çfarë është dhe çfarë nuk është e mundur.”
Plani ka ndryshuar gjithashtu me ardhjen e trajnerit të ri, Sérgio Conceição, pasi Paulo Fonseca u shkarkua në fund të dhjetorit pas vetëm gjashtë muajsh në detyrë. Ibrahimovic paralajmëroi të mos përmenden emrat e objektivave të transferimeve në televizion.
“Ne flasim çdo ditë me trajnerin, sepse na duhet të dimë çfarë dëshiron, strategjinë tonë dhe të mbajmë komunikimin të hapur. Tani e dimë çfarë na duhet dhe do të punojmë për këtë. Ky është tregu i transferimeve, sa më shumë të flas, aq më shumë do të kushtojnë lojtarët! Dalin emra çdo ditë dhe agjentët gjithashtu po kryejnë strategjitë e tyre”.
“Kjo është një skuadër e fortë, që tashmë ka fituar Superkupa-n, na duhet vetëm të gjejmë më shumë qëndrueshmëri”.
Tomori luan këtë mbrëmje, pavarësisht raportimeve se Juventusi është në bisedime për ta marrë atë në huazim me detyrim blerjeje për 25 milionë euro. Pra, a është mbrojtësi në shitje?
“Tomori është lojtari ynë, është i lumtur te Milani, ka luajtur mirë si nën drejtimin e Fonseca-s, por edhe Conceição e pëlqen shumë. Ai është një lojtar i Milanit”, siguroi Ibrahimoviç.
