Trajneri i Barcelona, Hansi Flick, ka thënë se Champions League është një nga garat më të vështira për t`u fituar.
Skuadra spanjolle ndeshet të martën me skuadren portugeze, benfica. Tekniku gjerman është shprehur se fokusi i tij mbetet te fitorja e ndeshjes së radhës kundër Benfica dhe përmirësimi i mëtejshëm i skuadrës.
"E ardhmja do të tregojë nëse jemi ndër favoritët apo jo", ka thënë Flick në një konferencë për shtyp të hënën. "Champions League është një nga garat më të vështira për t'u fituar, por duhet të përpiqemi. Kur shikoj Liverpool, shoh një ekip me fuqi të jashtëzakonshme. Është një nga ekipet e mia të preferuara në botë për momentin".
Barcelona po lufton në tri fronte, Champions League, La Liga dhe Copa del Rey, dhe Flick ka vlerësuar punën e skuadrës së tij, pavarësisht disa rezultateve të fundit jo të kënaqshme në kampionat. "Benfica është një ekip që luan shumë mirë, është kënaqësi t’i shohësh si ndërtojnë lojën. Angel Di Maria është një nga lojtarët e mi të preferuar. Të shohim si do shkoj nesër", ka thënë ai.
Flick ka ndarë emocionet e tij për rikthimin në stadiumin ku në vitin 2020 kishte fituar Champions League me Bayern Munich kundër Paris Saint-Germain.
"Kam kujtime të shkëlqyera nga ky stadium", ka thënë ai.
Flick ka thënë se pavarësisht rezultateve jo të kënaqshme kohëve të fundit në La Liga, Flick ka theksuar se performanca e ekipit është premtuese. "Skuadra po punon me përqendrim dhe po luan në mënyrë fantastike. Siç thashë pas ndeshjes me Getafe, ky është sezoni im i parë këtu dhe në La Liga. Nuk kisha përvojë dhe nuk e dija si do luanin kundërshtarët", ka thënë trajneri gjerman.
Barcelona është aktualisht në vendin e dytë në renditjen e Champions League, tri pikë pas Liverpool dhe Flick ka theksuar rëndësinë e sigurimit të një fitore ndaj skuadres portugeze për të shmangur një "play-off" eventual.
"Qëllimi ynë është të fitojmë kundër Benfica. Do të ishte një hap i madh për ne, dhe duam ta arrijmë këtë. Në pozicionin ku jemi, duke qenë të dytët, është e rëndësishme të sigurojmë këto pikë. Ka shumë ndeshje të mbetura deri në fund të sezonit, dhe mund të kursejmë dy ndeshje nëse shmangim 'play-off' duke përfunduar në tetëshen e parë", ka thënë ai.
