Liverpooli do të kërkojë pikën që do ta kualifikojë zyrtarisht në 1/8-at e Ligës së Kampioneve sot në “Anfield Road” përballë Lilës, por në konferencën për shtyp trajneri i anglezëve tha se vendi i parë në fazën e ligës jo domosdoshmërisht u garanton atyre një short të lehtë.“Gjëja më e rëndësishme sa herë që dalim atje, veçanërisht para tifozëve tanë, është që ne duam të fitojmë ndeshjen.
Me këtë organizim të ri, ju mendoni se renditja në vendin e parë është pozicioni më i mirë për të përfunduar, por duke qenë se është një tabelë kaq e çuditshme, unë shikoj PSG për shembull dhe çdo ndeshje, mendoj se ata kanë ekipin më të vështirë për t’u përballur.
Ata renditen mjaft poshtë në tabelë, gjë që nuk tregon cilësinë e tyre, por nëse renditeni të parët, mund të përballeni me ta. Unë nuk po e shikoj tabelën.
Ndoshta të qenit në vend të parë nuk të thotë se je skuadra më e mirë dhe të qenurit në vendin e 24 nuk të thotë se je numri 24 për nga cilësia. Ka të bëjë shumë me skuadrat me të cilat përballesh. Ne duam të fitojmë, por jo me idenë se kjo të na japë avantazh për pjesën tjetër të sezonit”.
Pas fitores 2-0 me Brentfordin në kampionat, trajneri kundërshtar Tomas Frenk e quajti Liverpulin skuadrën më të mirë në botë, por Slot mendon se është shumë herët për ta thënë këtë:
“Mendimi i tij do të thotë diçka për mua, padyshim, sepse ai ka treguar në Brentford se sa mirë ka bërë për kaq shumë vite, pa shpenzuar një shumë të çmendur parash. Çdo ndeshje ai është në gjendje të performojë shumë mirë në Premier Ligë dhe ta bëjë kaq të vështirë për secilën nga pesë apo gjashtë ekipet më të mira, kështu që mendimi i tij padyshim do të thotë diçka për mua.
Por mendoj se është shumë herët për mua të them këto gjëra. Ne duhet të përballemi me shumë ekipe dhe formati i Ligës së Kampioneve këtë sezon është gjithashtu i vështirë.
Nuk mendoj se ne ishim me fat në short. Është shumë e vështirë të gjykosh tabelën e ligës, por është gjithmonë mirë të marrësh komplimente nga një trajner që ka dëshmuar të jetë një menaxher kaq i mirë në Premier Ligë”.
