Trajneri i Liverpoolit, Arne Slot, pranoi se Federico Chiesa ka qenë i pafat, por u shpreh i kënaqur që sulmuesi i Italisë ishte pjesë e ekipit që shënoi dy gola të vonshëm kundër Brentford këtë fundjavë.
Slot diskutoi vështirësitë e Chiesës për të fituar minuta loje gjatë një konference për shtyp të hënën, në prag të ndeshjes së Ligës së Kampionëve kundër Lille.
“Çdo lojtar është unik, secili ka historinë e tij,” tha Slot, përmes This is Anfield.
“Jota pati një parasezon normal, mirë, jo krejt normal sepse ishte në Kampionatin Europian, por ai pati një fillim normal me ne, ndërsa Federico jo. Federico ishte i pafat disa herë kur mundësitë ishin aty për të luajtur, por ai ishte i sëmurë”.
Ish-lojtari i Juventusit dhe Fiorentinës ka bërë vetëm gjashtë paraqitje me Reds këtë sezon, duke shënuar një gol dhe duke dhënë një asist. Ai ka grumbulluar gjithsej 171 minuta lojë me Liverpoolin në sezonin 2024-25.
“Dhe pastaj shohim gjithashtu se sa e vështirë është, Jota është një shembull i shkëlqyer, për një lojtar që ka qenë jashtë për pesë, gjashtë, shtatë javë, ta rikthesh atë në ngarkesën për të luajtur çdo ndeshje 60-90 minuta,” vazhdoi Slot.
“Duhet të jesh shumë i kujdesshëm me këtë nëse nuk dëshiron që ai të mos pësojë një tjetër dëmtim, sidomos sepse nuk ka një pauzë dimërore dhe nuk ka kohë gjatë javës për t’u dhënë atyre minutazh”.
“Përveç nëse më duhet t’i aktivizoj te U21, por nuk mendoj se një lojtar si Federico Chiesa apo Diogo Jota duhet të luajnë në ato ndeshje. Kjo e bën të vështirë që një lojtar i dëmtuar të rikthehet.”
“Për fat të keq për Federicon, ai ka Mo Salah përpara tij. Kjo e bën të vështirë për ne ta ndërtojmë atë në mënyrën e duhur, por jam i lumtur që pati 30-45 minuta të mira kundër Accrington Stanley, dhe megjithëse ishte vetëm pesë minuta [kundër Brentford], ai ishte pjesë e ekipit që shënoi dy gola dhe ishte shumë i lumtur për këtë”, vazhdoi ai.
Chiesa iu bashkua Liverpoolit me transferim të përhershëm nga Juventusi verën e kaluar. Ai nuk ishte pjesë e planeve të Thiago Mottas në Torino, ndaj nuk u stërvit me ekipin gjatë parasezonit.
Chiesa, kampion i Europianit 2020 me Italinë, ka nënshkruar një kontratë deri në vitin 2028 me Anfield. Ai nuk ka luajtur për Kombëtaren Italiane që nga Europiani i kaluar.
