Derbi britanik në Ligën e Evropës, Mançester Junajtid kundër Gllasgou Rejnxhërs, do të zhvillohet të enjten në mbrëmje në “Olld Trafford” dhe do të transmetohet ekskluzivisht në RTSH 1. Të dyja skuadrat ndahen nga një pikë e vetme dhe synojnë një nga 8 vendet e para.
Manchester United kundër Glasgow Rangers, një derbi britanik në Old Trafford që do të transmetohet direkt në ekranin e Radio Televizionit Shqiptar, takim i vlefshëm për javën e shtatë fazën e grupit në Europa League.
Përballë dy skuadra me emër të madh në kampionatet respektive, por ku secila ka mbetur e zhgënjyer nga sezoni aktual.
Kriza e anglezëve është e njohur, e pranuar edhe nga vetë trajneri Ruben Amorim me fjalë që nuk lënë vend për keqinterpretime: ndoshta skuadra më e keqe në historinë e Manchester United.
Në 11 ndeshje në Premier League nën drejtimin e portugezit, Djajtë e Kuq kanë marrë vetëm 11 pikë dhe në pesë ndeshjet e fundit në Old Trafford ka pësuar katër humbje. Në Scottish Premier League, Rangers mban vendin e dytë, i distancuar nga vendi i tretë, por zhgënjimi ekziston për shkak të distancës së madhe, 13 pikë, nga vendi i parë, që mbahet nga rivali i madh Celtic, që ecën i sigurt drejt titullit.
Në Europa League, asnjë prej skuadrave nuk është pranë majës së renditjes, por gjenden brenda objektivit për t’u kualifikuar dhe aktualisht janë midis tetë të parave, por situata pritet të ndryshojë pas përballjes midis tyre. United ka 12 pikë, Rangers 11, po aq sa Tottenham e Steaua, ndjekur nga një grup skuadrash me 10 pikë.
Mesfushori i Shqipërisë, Nedim Bajrami, ka luajtur në gjashtë ndeshjet e para në Europa League, në të cilat ka shënuar edhe një gol, në fitoren 2-0 në Malmo, dhe pritet që të startojë edhe në Old Trafford përballë United. Në katër ndeshje të mëparshme midis dy skuadrave, janë arritur tri fitore për anglezët dhe një barazim, ndërkohë që skocezët nuk kanë shënuar asnjë gol.
