Nuk ka si mos të shfaqet i zhgënjyer pas ndeshjes Thiago Motta që ndalet në barazim nga Bryzhi dhe humbet shansin për një vend mes 8 më të mirave. Pas sfidës ai kritikoi skuadrën, e kryesisht sulmuesit, me përjashtim të Samuel Mbangulës.
“Të gjitha skuadrat që kanë luajtur këtu kanë pasur vështirësi.
Ata mbrohen mirë. Ne kemi pasur vështirësi, pa vuajtur në prapavijë, por nuk kemi krijuar mjaftueshëm për të fituar.
Mund të bënim më mirë, por duhet të respektojmë kundërshtarin dhe mos t’i heqim meritat sepse kanë vendosur shumë të tjerë në vështirësi. Kemi vuajtur pothuajse aspak, por s’kemi krijuar mjaftueshëm për të fituar.”
MUNGESA E GOLIT- “Ne kemi vuajtur pak. Pas shumë kohësh, më në fund kemi shumë lojtarë në dispozicion, kryesisht sulmuesit. Kemi nisur ndeshjen me Ueah, Niko Gonzalez dhe Mbangula, e më pas janë futur në lojë Konseisao, Vlahoviç e Jildiz. Duhet të shtojmë këtu edhe Kolo Muaninë. Janë lojtarë që dua të shoh më shumë prej tyre dhe që duhet të kontribuojnë më shumë”.
LOKATELI- “Ai na jep mundësinë që të kemi ekuilibër në fushë. Ai e di mjaft mirë se kurrë duhet të shtojë ritmin dhe kur duhet ta ulë atë. Në këto situata loje unë dua të shoh më shumë sulmuesit.
Mbangula ka provuar diçka më shumë sot, nga 5 lojtarët e tjerë dua të shoh shumë më shumë”, tha ndër të tjera Motta.
