Robert Lewandovwki (36 vjeç) ishte një nga protagonistët e përmbysjes epike të Barcelonës kundër Benfikës (5-4) duke shënuar dy penallti që ishin vendimtare për fitoren përfundimtare.Dy gola që zgjerojnë rekordin e tij spektakolar në këtë sezon.
Me dy golat në “Da Luz”, sulmuesi polak numëron 28 gola në 29 ndeshjet zyrtare që ka luajtur këtë sezon në të gjitha garat. Ai ka arritur dhe kaluar 26 golat që arriti të shënonte përgjatë gjithë sezonit të kaluar në 49 takime që zhvilloi.
Dy gola më shumë në 20 ndeshje më pak! Liga e Kampionëve është kompeticioni i preferuar i Levës pasi ai është golashënuesi më i mirë i edicionit aktual të turneut me 9 gola në 7 ndeshje të luajtura, ndërsa në La Liga ai është po i pari me 16 gola në 19 ndeshje.
E ndërsa vazhdon me rekordet e tij, polaku nuk mund të qëndronte indiferent pas asaj çfarë ndodhi të martën në mbrëmje në Lisbonë. Ai ka folur për mediat, duke e quajtur thjesht një çmenduri.
“Që në fushë e kuptuam se ajo ndaj Benfikës nuk ishte një ndeshje e zakonshme. E kam parë sërish dhe jam i bindur se ajo që ndodhi atje ishte një çmenduri. Rëndësi ka që në fund fituam dhe mendoj se kjo është gjëja më pozitive e mbrëmjes”, deklaroi polaku.
Por nëse ajo çfarë ndodhi në Portugali vazhdon të diskutohet, për Levandovskin ka vend edhe për kritika.
“Mendoj se tre golat e shënuar nga Benfika ishin dhurata në fakt nga ana jonë.
Ajo që më kënaq 2është se këtë herë kemi shënuar një gol më shumë se kundërshtari dhe nëse ndodh kjo në çdo ndeshje do të lumturohesha.
Por natyrisht ky ka qenë një takim nga i cili duhen nxjerrë mësime. Kemi për të mësuar se si mund të luajmë më mirë, si në mbrojtje ashtu edhe në sulm.
Para se ne të shënonim golin e pestë, Benfika pati një shans për të shënuar. Ky është një moment kur duhet pak më shumë përvojë dhe qetësi.
‘Nesër’ do të shohim se çfarë mund të bëjmë më mirë se ‘dje’”, tha Levandovski. Golashënuesi më i mirë në Liga dhe Champions gjithashtu donte të nënvizonte se për Barcelonën ishte shumë e rëndësishme shmangia e play-off duke parë dhe kalendarin mjaft të ngjeshur. “Kjo fitore mund të jetë shumë e rëndësishme për të ardhmen e sezonit, por edhe sepse ne mund të analizojmë se çfarë mund të bëjmë më mirë”, përfundoi Lewandowski.
