Rudi Garcia është trajneri i ri i kombëtares së Belgjikës. Ish-trajneri i Romës u prezantua të premten në një konferencë për shtyp: “Bisedimet me Vincent Mannaert filluan në dhjetor. Mendoj se kjo kombëtare ka një potencial të madh. ‘Djajtë e Kuq’ kanë pasur një gjeneratë me shumë talent, që mund të kishte fituar Kampionate Europiane ose Botërore.
Edhe sot janë ende pjesë e kombëtares disa prej lojtarëve të asaj gjenerate, të cilët duhet të mbështesin të rinjtë. Të rinjtë belgë luajnë për klube të mëdha që në moshë të re, por duhet t’i mbështesim për t’i ndihmuar të shkëlqejnë”.
Mbi rikthimi e mundshëm të Courtois, trajneri francez shtoi: “E llogarisim edhe Thibaut Courtois. Kemi cilësi në portë, përmend këtu Matz Sels dhe Koen Casteels. Sidoqoftë, kur ke portierin më të mirë në botë, nuk mund të mos e përdorësh atë”.
Garcia zbuloi një kontakt të mëparshëm, 10 vite më parë me kombëtaren belge: “Ishte në një moment tjetër. Jam këtu tani, ndoshta kështu e deshi fati. Në çdo rast, tani kam më shumë përvojë sesa atëherë”.
Përvoja me emra të mëdhenj: “Lojtarët e mëdhenj janë më të lehtë për t’u menaxhuar, por duhet të jesh i ndershëm dhe transparent me ta. Mendoj se lojtari më i ri në ekip është po aq i rëndësishëm sa më i moshuari. Në të kaluarën kam folur shpesh me lojtarët më të rëndësishëm për të kuptuar këndvështrimin e tyre në momente delikate”.
Mbi realitetin e ri si trajner: “Nuk e di ende ku do të jetoj. Gjëja më e rëndësishme është që do të jap gjithçka në këtë punë. Nuk mund të premtoj asgjë, por do të jap gjithë energjinë time në këtë detyrë.
Shpresoj të bëj mirë këtu, të përqendrohemi fillimisht te muaji mars dhe pastaj te kualifikimi në Botëror. Nuk janë të rëndësishme vetëm rezultatet, dua gjithashtu që lojtarët të kënaqen përsëri me kombëtaren. Do ta mësoj himnin, për mua nuk është problem”.
