Teuta e ka marrë shumë seriozisht ndeshjen e javës së 22- të me Skënderbeun, ku shpreson të bëjë kthesën e madhe.
Para se të kryente stërvitjen e djeshme, trajneri Bledar Devolli foli gjatë me grupin e lojtarëve në fushë, më pas edhe “kokë më kokë” me disa prej tyre.
Fokusi është te gjendja psikologjike, që është rënduar disi nga rezultatet e fundit.
Ashtu siç tha edhe pas prezantimit në krye të Teutës, trajneri gjirokastrit beson se do ta kalojë ngërçin që në transfertën e Korçës. Përpara ka shumë ndeshje dhe në kampin durrsak kanë bindjen se situata do të ndryshojë, me Teutën që do të shohë drejt pjesës së sipërme të tabelës.
Te durrsakët po punohet edhe për merkaton dhe vëmendja është te gjetja e një numri 6, që do të zëvendësonte Ledjo Beqjan, i cili u transferua në Hungari pak kohë më parë, duke lënë një boshllëk të madh në mesfushën e Teutës. Në këtë sektor kjo skuadër ka nevojë patjetër për një përforcim dhe klubi po sheh të gjitha alternativat për të gjetur lojtarin më të përshtatshëm për trajnerin Devolli.
KORÇA – Me Skënderbeun pritet një ndeshje mjaft e vështirë, pasi kundërshtari ka nevojë për pikë dhe do të bëjë gjithçka në fushën e vet për të fituar. Vlerësimi nga “Djemtë e detit” për këtë sfidë është maksimal.
Rikthehen për këtë ndeshje mbrojtësit Marku dhe Jazxhi, si dhe mesfushori Lloci. Të tre këta lojtarë munguan kundër Partizanit për shkak kartonësh dhe probleme shëndetësore.
Durrsakët shkojnë më të plotë në Korçë dhe ky është një plus për të kërkuar rezultatin pozitiv.
Sa i takon formacionit, trajneri Devolli në kaq pak ditë mund të bëjë vetëm ndonjë ndryshim të vogël, ai po punon më shumë me anën psikologjike, ndërkohë që u ka kërkuar lojtarëve të jenë grup. Janë pikët ato që e ndryshojnë situatën dhe Teuta, pas dy humbjeve radhazi, synon të bëjë kthesën me Skënderbeun, për të nisur ngjitjen në tabelë.
