Mançester Junajtid iu rikthye fitoreve të enjten mbrëma me suksesin dramatik 2-1 ndaj Rejnxhërsit në Ligën e Europës.“Djajtë” ishin skuadra më e mirë gjatë 90 minutave, megjithatë skuadra e Bajramit për pak sa nuk arriti të merrte një pikë, duke barazuar në 88’. Por Bruno Fernandesh i riktheu në avantazh në 92’.
Duke folur para ndeshjes së të dielës me Fulhamin, Amorim tha se klubi është me fat që ka një lojtar si Fernandesh, i cili është me të vërtetë i rëndësishëm për ekipin. “Ne jemi me fat që kemi një lojtar si Bruno Fernandesh! Ndonjëherë ai bën gabime… si unë javën e kaluar.
Por ai është me të vërtetë i rëndësishëm dhe ka pasion dhe kjo është shumë e rëndësishme për një futbollist”.
Portugezi u pyet gjithashtu për të ardhmen e Markus Rashfordit, i cili ka qenë jashtë skuadrës për shkak se është pritur që të largohet nga “Old Trafford” këtë muaj. Amorim tha se nuk e di se çfarë do të ndodhë me sulmuesin, por e ardhmja e tij do të zgjidhet deri në fund të merkatos së dimrit.
“Nuk e di. Unë me të vërtetë nuk e di. Janë edhe tetë ditë djema.
Do të shohim në fund të merkatos se çfarë do të ndodhë. Dhe pastaj ne do të flasim për këtë në atë moment”. Junajtid renditet në vendin e 13- të në tabelë me 26 pikë. Ata duhet të ndërtojnë një seri të gjatë fitoresh për të pasur ndonjë shans për të hyrë në pesë vendet e para. Diferenca me rivalët e Sitit tani është 12 pikë, ndërsa ata janë më pranë zonës së rënies se skuadrave që shkojnë në Europë.
