Futbollisti kroat Jakov Jelkiq është gjetur i vdekur të hënën në Spanjë, raporton portali Informacion.
Jelkiq u zhduk natën mes 31 janarit dhe 1 shkurtit në qytetin spanjoll të Alicante.
Megjithëse rezultatet e autopsisë janë ende në pritje, policia spanjolle beson se ishte një aksident, pa ndikimin e palëve të treta.
Sipas mediave spanjolle, trupi i Jelkiq-it është gjetur në një thellësi prej dy metrash pranë njërës prej kalatave në port, pak para orës 18:30.
Futbollisti 24-vjeçar ishte pjesëtar i klubit zviceran Granges-Paccot, i cili kishte mbërritur në Spanjë për të luajtur një ndeshje.
Kroati doli në një klub nate të premten, së bashku me shokët e tjerë të skuadrës. Teksa u largua nga klubi, ai tha se duhej të kthehej për të kërkuar xhaketën e tij. Ai nuk e gjeti, u përpoq përsëri dhe shokët e skuadrës nuk e panë më pas.
