Njeriu më ndikues te Bayern, Uli Hoeness, ka lëshuar një deklaratë të bujshme duke dhënë një sinjal të rëndësishëm për merkaton e klubit bavarez.
“Nëse do më lejonin një ëndërr, krejt pa limite financiare, do të thoja vetëm një emër: Florian Wirtz”, ka deklaruar ish-presidenti i Bayern, i cili vijon të ketë një impakt të fuqishëm në Mynih.
Gazeta TZ ka ngritur dyshimet pas kësaj deklarate: “Mos vallë Hoeness po paralajmëron goditjen e madhe të Bayern në merkato? Mos vallë marrëveshja me Wirtz është mbyllur?”
Këtë askush nuk e di. Deri tani, në media është raportuar se Wirtz nuk lëviz nga Bayer Leverkuseni deri në Kupën e Botës 2026. Pra, ai do të luajë edhe një sezon e gjysmë në “Bay Arena”, në mënyrë që të mos i shtojë presion vetes përpara Botërorit dhe vendimin ta marrë vetëm pas turneut të rëndësishëm me Gjermaninë.
Vlera e tij aktualisht në treg llogaritet nga 100 deri në 120 mln euro, shifër shumë e lartë, madje edhe për një klub si Bayern. Për mesfushorin ofensiv ka interes edhe Real Madrid.
Ndërkohë, Bayern po konsideron një temë tjetër në sulm. Leroy Sane është shprehur i gatshëm të firmosë një kontratë të re në Mynih, në bazë të së cilës paga e tij të varet nga performanca në fushë. Deri tani klubi nuk ka marrë asnjë vendim, përtej dëshirës dhe vullnetit të mirë të gjermanit.
