Dieta e pazakontë që Cristiano Ronaldo konsumon për ta mbajtur trupin në formë në moshën 40-vjeçare!
Cristiano Ronaldo ndjek një regjim të rreptë ushqimor për të ruajtur formën e tij të jashtëzakonshme edhe në moshën 40-vjeçare.
Pesë herë fituesi i Topit të Artë festoi ditëlindjen të mërkurën, vetëm dy ditë pasi realizoi dy gola në fitoren 4-0 të Al Nassr kundër Al Wasl.
Ronaldo ka folur shpesh për dëshirën e tij për të luajtur në nivele të larta edhe pas të 40-ave, duke vazhduar një karrierë të lavdishme që filloi te Sporting CP në vitin 2002.
Në një kohë kur shumë futbollistë dalin në pension në të tridhjetat, fakti që CR7 vazhdon të shënojë gola në statistikat e tij të pabesueshme është dëshmi e dietës së tij të rreptë dhe rutinës rigoroze të stërvitjes.
Sekreti i një diete të hekurt
Ronaldo ndjek një dietë të pasur me proteina, duke shmangur sheqernat dhe duke u përqendruar në yndyrna të shëndetshme, karbohidrate integrale, fruta dhe perime.
Në një konferencë për shtyp gjatë Euro 2020, ai refuzoi të pinte Coca-Cola, duke i këshilluar të rinjtë të konsumonin ujë.
Ai ka një nutricionist personal dhe nuk konsumon ushqime të ngrira. Kur darkon në restorante, zakonisht porosit biftek me sallatë.
Por një nga pjatat e tij të preferuara është Bacalhau à Brás, një recetë tradicionale portugeze me merluc të kripur, qepë, patate dhe vezë. Sipas Ronaldos, ky ushqim i kujton fëmijërinë dhe e ndihmon të mbetet i fortë.
Regjim stërvitor ekstrem
Ronaldo kalon 3-4 orë në ditë në stërvitje, duke kombinuar 30 minuta ushtrime kardio me pesha të fokusuara pesë herë në javë.
Në vitin 2019, ai u bë fytyra e SIXPAD, një kompani japoneze që prodhon pajisje për stimulimin elektrik të muskujve (EMS).
‘Pulë magjike’ dhe gjashtë vakte në ditë
Ndryshe nga shumica që konsumojnë tre vakte në ditë, Ronaldo ndjek një regjim me gjashtë vakte të vogla, duke i dhënë trupit furnizim të vazhdueshëm me lëndë ushqyese.
Ai e cilëson mishin e pulës si ‘magjik’, për shkak të përfitimeve shëndetësore që ofron, dhe shmang alkoolin dhe pijet e gazuara.
Teknologjia në shërbim të shëndetit
Ronaldo ka investuar në Bioniq, një kompani që përdor inteligjencën artificiale (AI) për të krijuar suplementë të personalizuar bazuar në analizat e gjakut të klientëve.
Ai thotë se ka përdorur produktet e Bioniq për gati tre vjet, duke besuar se mund të ndihmojnë njerëzit të ruajnë performancën maksimale për më gjatë.
Sekreti i gjumit ‘si një fëmijë’
Ronaldo ndjek një metodë të njohur si ‘gjumë polifazik’, ku ai fle në intervale të 90 minutave gjatë ditës në vend të një gjumi të gjatë – gjatë natës.
Kjo teknikë e ndihmon të maksimizojë rikuperimin dhe të jetë gjithmonë energjik.
Terapia e ftohtë dhe rikuperimi i avancuar
Në vitin 2021, pas rikthimit te Manchester United, Ronaldo instaloi në shtëpinë e tij një dhomë krioterapie me vlerë 50,000 £, që ndihmon në reduktimin e inflamacionit dhe përmirësimin e qarkullimit të gjakut.
Ai gjithashtu përdor teknologjinë Whoop, një pajisje inteligjente që analizon gjumin, stresin dhe performancën fizike.
Përveç kësaj, Ronaldo ka krijuar ERAKULIS, një aplikacion që ofron plane stërvitore të personalizuara, këshilla ushqimore dhe teknika për reduktimin e stresit.
Një buzëqeshje e trajnuar?
Në vitin 2014, ai befasoi fansat duke promovuar një pajisje japoneze për stërvitjen e muskujve të fytyrës, e krijuar për të tonifikuar nofullën dhe për të përmirësuar buzëqeshjen.
Ronaldo nuk lë asgjë në dorë të fatit kur bëhet fjalë për formën e tij fizike. Me një përkushtim ekstrem ndaj dietës, stërvitjes dhe rikuperimit, ai vazhdon të jetë në nivelet më të larta të futbollit edhe në moshën 40-vjeçare..
