Me përjashtim të një kthese të papritur të ngjarjeve, Jonathan Tah, do të jetë transferimi i parë i Barcelonës për sezonin 2025-26. Mbrojtësi gjerman, aktualisht tek Bayer Leverkusen, ka marrë një vendim të prerë dhe ka refuzuar propozimet më tërheqëse financiarisht, duke përfshirë një nga Bayern Munich dhe një nga Real Madrid, për të përmbushur dëshirën e tij për të veshur fanellën e Barçës.
Burime pranë lojtarit thonë se ai është plotësisht i vendosur. Në fakt, një takim është planifikuar në Barcelonë në javët në vijim për të finalizuar detajet e transferimit të tij.
Sipas MundoDeportivo, marrëdhënia e qendërmbrojtësit me Hansi Flick, e krijuar gjatë kohës kur trajneri gjerman drejtonte “Pancerat” , ka qenë kyç në vendimin e tij.
Trajneri i katalanasve e konsideron atë një pjesë ideale për të përforcuar mbrojtjen për sezonin e ardhshëm. Interesi i Barcelonës për Tah nuk është i ri. Klubi katalanas u përpoq të siguronte shërbimet e tij verën e kaluar, por Leverkusen refuzoi të negocionte.
Me përfundimin e kontratës së tij më 30 qershor, Tah është i lirë të vendosë për të ardhmen e tij dhe nuk ka hezituar të “përqafojë” projektin e Barcelonës mbi opsionet e tjera.
Edhe pse klubi katalanas duhet të zgjidhë disa çështje të brendshme, si largimi i mundshëm i një qendërmbrojtësi për t’i lënë vend atij, gjermani është i gatshëm të presë. Dëshira e tij për t’iu bashkuar Barçës është aq e fortë sa ai ka refuzuar ofertat që janë financiarisht superiore, nga dy super klube të tjera si Bayern Munich dhe Real Madrid.
