Real Madridi mbrëmë (e shtunë) luajti baras me rezultat 1-1 ndaj Osasunës në udhëtim në kuadër të javës së 24-të në La Liga.
Ky barazim mund të ketë pasoja për madrilenët pasi në rast se Barcelona fiton të hënën ndaj Rayo Vallecanos, atëherë do të ‘rrëmbente’ kreun e tabelës.
Më shumë se sa rezultati, ajo që u diskutua pas ndeshjes kishte të bëjë kryesisht me vendimet e gjyqtarit Jose Munuera.
Po zhvillohej minuta e 39-të e ndeshjes kur Munuera e nxori nga xhepi kartonin e kuq për ta përjashtuar nga loja anglezin Jude Bellingham.
Të gjithë mbetën të habitur nga ky veprim i gjyqtarit pasi ishte e qartë se ky karton nuk u dha për ndonjë ndërhyrje të palejueshme, por për një debat mes palëve.
Gjyqtari Munuera pas ndeshjes pretendoi se Bellingham e ka ofenduar me fjalor të rëndë, ndërsa ky i fundit tha se ka pasur një keqinterpretim të fjalëve që ai ka thënë.
Tani një ditë pas përfundimit të asaj ndeshje, ka ardhur edhe reagimi i Bellingham përmes rrjeteve sociale.
“U tha mjaftueshëm për atë keqkuptim, vetëm desha të kërkoj falje sërish që i lashë bashkëlojtarët e mi në një pozitë kaq të vështirë dhe t’i falënderojë tifozët për mbështetjen dhe mirëkuptimin e tyre”, ka shkruar Bellingham.
Tashmë është bërë e ditur se drejtuesit e klubit gjatë ditëve në vijim do të paraqesin provat e tyre në tentim për ta anuluar kartonin e kuq të mesfushorit.
