Legjenda e futbollit gjerman, Stefan Effenberg, ka një këshillë për trajnerin e Gjermanisë, Julian Nagelsmann. Sipas tij, Leon Goretzka meriton të rikthehet në kombëtaren e “pancerave”.
Mesfushori i Bayern (30) ka disa muaj që nuk luan me kombëtaren. Kjo, sepse në gjysmën e dytë të sezonit të kaluar dhe në nisje të sezonit aktual ai nuk po luante mjaftueshëm te Bayern.
Goretzka, megjithatë, ka minimalisht 2 muaj që është rikthyer në formë. Trajneri Kompany tashmë beson tek ai dhe po e aktivizon si titullar në shumicën e ndeshjeve.
“Goretzka është i gjatë, ka fizikun, është i fortë në duele, nuk u shmanget kurrë përballjeve për topin në mesfushë dhe ka shumë cilësi kur i afrohet zonës kundërshtare”, ka thënë Effenberg.
“Ai e ka merituar këtë status që ka sot, pra titullar i Bayern. E ka treguar se sa profesional është, nuk është dorëzuar dhe as nuk është ankuar. Të gjithë trajnerët i duan lojtarët me karakter dhe Goretzka i tillë është”.
“Kur je titullar te Bayern, gjithmonë duhet të konsiderohesh për t’u grumbulluar me kombëtaren”, ka argumentuar Effenberg, fiks pak javë përpara ndeshjeve të muajit mars.
