E ardhmja e Frenkie de Jong në Barcelonë mbetet ende i paqartë dhe Liverpooli është duke e konsideruar një mundësi të transferimit të mesfushorit holandez, me mendjen që mund ta marrë atë me një çmim të reduktuar.
Kontrata e futbollistit holandez do të skadojë në vitin 2026, ndërsa, duke e pasur parasysh rrogën e tij të lartë, klubi katalunas shpreson që të përfitojë nga shitja e tij, plus ta kursejë rrogën e tij.
27 vjeçari ka qenë objektiv i klubeve angleze qe një kohë të gjatë, ndërsa më parë atë e donte Manchester Unitedi.
Futbollisti e ka shprehur gjithmonë dëshirën e tij për të qëndruar në Camp Nou, por që ai asnjëherë nuk ka lënë gjurmë të thella për t’i bindur drejtuesit e klubit që ta konsiderojnë atë të pashitshëm.
Për momentin, sipas portalit “TEAMtalk”, Barcelona nuk duket e gatshme të bëjë zbritje dhe e ka caktuar çmimin e kartonit të futbollistit – 35 milionë euro, përcjell “Gazeta Express”.
Një shifër që Liverpooli e konsideron si adekuate, por për ta bërë të mundshëm këtë transferim duhet të punohet me menaxherët e De Jong, i cili duket se nuk është i gatshëm të pranojë zbritje të rrogës.
Nga ana tjetër, “Reds” nuk e kanë ndërmend “ta thyejnë bankën” në këtë drejtim.
Por, kjo nuk është e tëra.
Thuhet se interesi për mesfushorin kreativ ka shfaqur edhe Juventusi, i cili nuk është bindur sa duhet me paraqitjet e Douglas Luiz dhe për këtë ka kërkuar informata për futbollistin holandez.
Njëjtë si Liverpooli, edhe gjiganti italian do të kërkonte ulje të rrogës së futbollistit.
E ardhmja është në duart e lojtarit të lindur në vitin 1997.
Nëse do të pranojë të bëjë kompromis dhe ta pranojë uljen e rrogës, mund të ketë zhvillime të reja në muajt në vazhdim.
Në të kundërtën, Barcelona duhet të mendojë për një tjetër zhvendosje.
