Problemet ligjore për Keylor Navas nuk pakësohen. Transferimi në Argjentinë, ku ai mbron shtyllat për Newell’s Old Boys, nuk e ka përmirësuar situatën e tij ligjore. Portieri i Kosta Rikës është sërish në qendër të polemikave, pasi u përfshi në një rast që përfshin një markë elektrostimulimi në vendin e tij në vitin 2020.
Kompania në fjalë kishte dështuar të respektonte angazhimet e saj, duke i lënë klientët me produkte të dëmtuara dhe duke shkaktuar një kërkesë prej 150,000 dollarësh.
Verën e kaluar, ndërsa ishte ende te Paris Saint-Germain, Navas u akuzua se punësoi një punëtor pa kontratë dhe e detyroi të jetonte në kushte të pasigurta, në një bodrum të lagësht dhe pa dritare. Tani, megjithatë, portieri duhet të përballet me një rast të ri, këtë herë të lidhur me federatën e futbollit të Kosta Rikës.
Sipas Marca, 38-vjeçari është thirrur të dalë në gjykatë për një çështje delikate sportive. Disa zyrtarë të federatës lokale e akuzojnë atë se ka kërcënuar se do të humbasë me qëllim ndeshjet nëse trajneri Jorge Luis Pinto nuk shkarkohej.
Ish-trajneri, i cili drejtoi kombëtaren mes viteve 2011 dhe 2014, tha: “Mesazhi i vetëm që mora nga presidenti i federatës ishte se nëse do të qëndroja në krye, lojtarët do të humbnin tre ndeshje radhazi për të më shkarkuar”.
Vlen të kujtojmë se Kosta Rika pati një ecuri të jashtëzakonshme në Botërorin 2014 në Brazil, duke arritur deri në çerekfinale dhe duke humbur penallti nga Holanda. Pas atij udhëtimi historik, Jorge Luis Pinto megjithatë u hoq nga posti i tij. Rasti mund të ketë pasoja të mëdha për Navas, e ardhmja e të cilit duket gjithnjë e më e pasigurt.
