Pas një fitoreje të shkëlqyer ndaj rivalit Bayer Leverkusen në ndeshjen e parë të së tetës së finales së Ligës së Kampionëve, Bayern Munichu e mori një lajm të keq që lidhet me Manuel Neuer.
Kapiteni i ekipit të Vincent Kompany u largua nga fusha për shkak të dëmtimit të pësuar në minutën e 59-të të ndeshjes, ndërsa në vend të tij hyri 21 vjeçari Jonas Urbig.
Është e pabesueshme, por e vërtetë: lëndimi i veteranit të portës u shkaktua nga vrapimi i tij për ta festuar golin e shokut të tij të skuadrës, Musiela.
Gjiganti bavarez e lëshoi një deklaratë në lidhje me gjendjen e portierit legjendar gjerman.
“Manuel Neuer e pësoi një këputje të muskulit në pulpin e djathtë në fitoren 3:0 ndaj Bayer Levrkusenit në ndeshjen e Ligës së Kampionëve të mërkurën mbrëma. Diagnoza është konfirmuar nga stafi mjekësor i Bayernit. Prandaj, portieri i kampionëve të shumëfishtë do të jetë jashtë fushës së blertë për një periudhë të pacaktuar”, njoftoi klubi gjerman.
Sipas “Sky Sport DE”, një rikthim i 38-vjeçarit para ndeshjeve të Kombëtareve (18-26 mars) është aktualisht jorealist, që do të thotë se ai mund ta humbasë jo vetëm ndeshjen e kthimit kundër Leverkusenit të Granit Xhakës, por edhe ndeshjet e Bundesligës kundër Bochum, Union Berlin dhe St. Pauli.
Sipas këtij vlerësimi, ai duhet të rikthehet në kohë për çerekfinalen e mundshme të Championsit, lajm që mund të jetë me interes edhe për Interin, në rast se skuadra e Simone Inzaghit do të kalojë në xhiron e ardhshme.
