Carlo Ancelotti e ka cilësuar luhatjen e formës së Kylian Mbappe si diçka ‘gjenetike’ teksa e ka paralajmëruar yllin e Real Madridit se duhet të pranojë ‘uljet dhe ngritjet’.
Reprezentuesi francez nuk arriti që të ketë ndonjë ndikim në fitoren e Real Madridit me rezultat 2-1 ndaj Atletico Madridit në Ligën e Kampionëve, duke bërë që të bëhen pyetje për formën e tij.
Mbappe ishte i jashtëzakonshëm në raundin paraprak ndaj Manchester Cityt, duke shënuar katër gola për dy ndeshje, përfshirë het-trikun në ‘Santiago Bernabeu’.
Sidoqoftë, që prej asaj nate ai ka tri ndeshje radhazi pa shënuar gol pasi nuk e ka gjetur portën ndaj Gironës, Real Betisit dhe Atleticos.
Kur u pyet nëse paraqitja e Mbappes ndaj Atleticos meriton kritika, Ancelotti ishte i shpejtë me përgjigjen në mbrojtje të lojtarit të tij.
“Shumë keq? Jo. Ajo që shohim ne është që ai nuk e bëri ndaj Atleticos atë që e bëri ndaj Cityt. Ndaj Cityt ai shënoi tre, ndaj Atleticos nuk e bëri. Në përgjithësi ai po bën mirë, ne jemi shumë të lumtur me të”.
“Ai nuk mund të jetë gjithmonë në formën më të mirë. Ndaj Atleticos nuk ishte, por në një sezon kaq kërkues, kjo është normale, mbi të gjitha për lojtarët me kualitet”.
“Lojtarët me kualitet kanë ulje ngritje. Kjo është diçka gjenetike. Për lojtarët me kualitet të madh, është e vështirë që të kenë vazhdimësi, por ai po bën mirë”.
“Nëse ne jemi në 1/8-tën e finales në Ligën e Kampionëve, merita të mëdha i takojnë atij”, ka thënë Ancelotti.
