Viktor Osimhen ka ndarë mendimet personale në një intervistë për podkastin e Xhon Obi Mikel, ku ka folur për transferimin e tij nga Napoli te Gallatasaraj dhe sfidat që ka përjetuar.
Sulmuesi nigerian nuk ka dhënë shumë detaje mbi të ardhmen e tij, por ka zbuluar disa prapaskena nga periudha që ka kaluar te Napoli dhe përshtatjen në Turqi. Ai ka pranuar se përgatitja e tij para-sezonale nuk ishte ideale.
“Nuk arrita të përgatitesha siç duhej. Kishte konfuzion dhe njëfarë kaosi, ndaj ende po përpiqem të rikthehem 100% në formën time. Megjithatë, klubi dhe shokët e ekipit më kanë mbështetur shumë,” tha në fillim Osimhen.
Ky i fundit ka vlerësuar tifozët e Gallatasarait, duke theksuar ngrohtësinë me të cilën e kanë pritur.
“Kur pashë dashurinë e tyre, kuptova që duhej të përshtatesha sa më shpejt. Këtu ndjehem si në shtëpi.
Tifozët më kanë habitur, nuk e prisja që aq shumë njerëz të më prisnin në aeroport. Nuk e dija që po ndiqnin fluturimin tim.
Skena në aeroport ishte e pabesueshme, si në një film,” tha Osimhen.
Një rol të rëndësishëm në zgjedhjen për të luajtur te Galatasaray ka pasur idhulli i tij, Didier Drogba.
“Gjithmonë e kam ndjekur atë. Edhe Dries Mertens ka luajtur këtu, Drogba ka qenë gjithmonë një nga modelet e mia,” tha në fund Osimhen.
