Medica Gjakova dhe Instituti për Hulumtime dhe të Drejtat e Njeriut (IHDNJ) kanë lansçuar një projekt të ri për mbështetje të të mbijetuarve të dhunës seksuale gjatë konfliktit në Kosovë.
Iniciativa synon t'u ofrojë atyre mbështetje gjithëpërfshirëse dhe të promovojë drejtësi për ata që ende po luftojnë me pasojat e dhunës së përjetuar gjatë konflitktit të viteve 1998-99.
“Të mbijetuarit/at e dhunës seksuale gjatë konflitktit në Kosovë kanë përjetuar një mori sfidash, përfshirë trauma psikologjike, probleme shëndetësore, dhe përjashtim social dhe ekonomik”, thuhet në komunikatën e lëshuar nga IHDNJ.
Ky projekt është i mbështetur nga Bashkimi Evropian, përmes Programit të Kombeve të Bashkuara për Zhvillim (UNDP) dhe synon të ofrojë ndihmë përmes procesit ligjor për kompensim dhe drejtësi, si dhe përmes grupeve mbështetëse për trajtimin e traumave, fuqizimin ekonomik dhe ngritjen e vetëdijes.
Sipas njoftimit vetëm 1 mijë e 650 nga rreth 20 mijë të mbijetuar/a kanë fituar statusin zyrtar si të mbijetuar/a të dhunës seksuale të lidhur me konfliktin në Kosovë.
Projekti “Vetëdijësim, drejtësi dhe reparacion për të mbijetuarat e dhunës seksuale”, është duke u realizuar në një periudhë kohore 15-mujore dhe ka si qëllim mbështetje për 40 të mbijetuar/a, përfshirë edhe anëtarët e familjeve të tyre.
“Në vitet 1998-99, rreth 20 mijë persona në Kosovë përjetuan dhunë seksuale. Pas viteve të heshtjes dhe margjinalizimit, vendi ka bërë përparim në njohjen dhe mbështetjen e të mbijetuarve, por ende ka shumë punë për t'u bërë”, thuhet në njoftim.
