Drejtoria e Arsimit, në bashkëpunim me Asamblenë Komunale të Fëmijëve në Gjilan, ka organizuar një program festiv në nder të 17 shkurtit – Ditës së Pavarësisë së Kosovës.
Programi është mbajtur në Teatrin e Qytetit të Gjilanit, ku Asambleja e Fëmijëve përmes një njoftimi publik kishte ftuar të gjithë qytetarët të bëhen pjesë e këtij manifestimi.
“Atdheu është dashuria që ndriçon rrugën tonë,” thuhet në ftesën e Asamblesë.
Në këtë ngjarje festive morën pjesë një numër i madh nxënësish, prindërish dhe mësimdhënësish, duke krijuar një atmosferë të veçantë dhe emocionuese.
Ndërkohë, Komuna e Gjilanit ka paraparë një sërë aktivitetesh për shënimin e 17 Shkurtit, duke përfshirë ngjarje kulturore dhe manifestime festive.
