Të martën paradite në Sallën e Administratës Qendrore të Universitetit të Prishtinës është mbajtur mbledhja komemorative për Izet Gjinovcin.
Gjinovci, që kishte një jetë në hendboll, ndërroi jetë të hënën paradite.
Prej vitit 2002 e deri në frymën e fundit e ka mbajtur pozitën e sekretarit të përgjithshëm të FHK-së. I ndjeri Gjinovci ishte për mbi katër dekada në hendboll, ndërsa ka kontribuar në pozita të ndryshme.
Në emër të familjes ka folur bashkëshortja e të ndjerit, Valbona.
“20 vjet më parë mora rrugë për në Prishtinë. Për 20 vjet më dha dashuri e kujdes.
Por nuk isha dashuria më e madhe e tij. Dashuria më e madhe e tij ishte hendbolli. Ishim si në dy anë të peshores, ndërsa hendbolli fitoi. Ishte aq i fortë sa që nuk mendonte sëmundjen, por vetëm rezultatet e hendbollit”, ka thënë ajo, duke falënderuar Dr. Ilir Kurtishi për kujdesin e madh për plot tri vjet ndaj të ndjerit. Valbona Gjinovci ka falënderuar edhe gjithë bashkëpunëtorët e të ndjerit, duke veçuar Muhamet Arifin, asistentin e tij.
“Ai ishte si djali i Izetit e tani është si djali im”.
Në fund për personalitetin e Izet Gjinovcit foli edhe miku i tij, Sokol Axhemi.
Varrimi i të ndjerit bëhet sot nga ora 17:00 në varrezat e fshatit Makërmal, në komunën e Skenderajt.
