Përmes një letre të presidentit të Federatës Evropiane të Hendbollit, Michael Wiederer për presidentin e Federatës së Hendbollit të Kosovës,
Eugen Saraçini, EHF-ja ka vlerësuar shumë lart organizimin e Kampionatit Evropian U18 në Prishtinë.
Përmes letrës, EHF-ja ka “shprehur mirënjohjen e thellë dhe vlerësimin e sinqertë për FHK-në, për organizimin e jashtëzakonshëm të Evropianit”.
Kjo ishte ngjarja e tretë rresht e organizuar nga FHK-ja, pas një Evropiani për hendbolliste të reja dhe një Evropiani për të rinj (U20).
Presidenti Wiederer ka shkruar se ngjarja e këtij muaji konfirmon progresin dhe përkushtimin e jashtëzakonshëm të Kosovës për zhvillimin e hendbollit.
“Vendimi për të organizuar Evropianin ishte hap ambicioz përpara, por hap që jo vetëm ka përmbushur pritjet tona, por edhe i ka tejkaluar ato. Jemi veçanërisht mirënjohës për përkushtimin e palëkundur të FHK-së dhe vëmendjen maksimale ndaj detajeve. Profesionalizmi i treguar në përgatitjen dhe realizimin e ngjarjes, si dhe cilësia e lartë e infrastrukturës dhe aranzhimeve logjistike ishin shembullore”, shkruan tutje në letrën e EHF-së, ku vlerësohet edhe pritja e ngrohtë për të gjithë pjesëmarrësit.
Presidenti Wiederer ka shkruar se të gjithë pjesëmarrësit u ndien si në shtëpinë e tyre gjatë qëndrimit në Kosovë. EHF-ja ka falënderuar të gjithë vullnetarët dhe anëtarët e stafit.
“Ne presim që të vazhdojmë bashkëpunimin e ngushtë me FHK-në edhe në vitet në vijim”, shkruan ndër të tjera në letrën e gjatë falënderuese të EHF-së për federatën tonë.
