Sfida mes Kastriotit të Ferizajt dhe Sllobodës së Tuzllës, me kureshtje pritet nga dashamirët e hendbollit jo vetëm ferizajas.
Slloboda është nga Bosnja dhe Hercegovina dhe ndeshet me fituesin e Kupës së Kosovës në kuadër të ndeshjes së parë të rrethit të parë të Kupës Evropiane.
Për ndeshjen e radhës ka folur hendbollisti i Sllobodës, Ermin Ombasha.
Si sheh ndeshjen me Kastriotin?
“Kemi bërë stërvitjen e fundit para udhëtimit në Kosovë. Jemi përgatitur mirë për këtë ekip, e dimë që nuk duhet t'i nënvlerësojmë dhe duhet t'i qasemi seriozisht lojës”, tha për faqen e klubit boshnjak.
Hendbollisti boshnjak mendon se janë për një nuancë favorit ndaj Kastriotit.
“Mendoj se nuk do të mungojë një rezultat i mirë sepse skuadra është gati, e dimë se çfarë na pret dhe mendoj se jemi pak favorit në krahasim me skuadrën e Kastriotit”, tha Ombasha.
Për të katërtin vit radhazi, Slloboda luan në garat evropiane, ndërsa rezultatin më të mirë e kanë arritur sezonin e kaluar kur arritën në të tetën e finales së Kupës së Evropës.
