Kampioni i Kosovës, Rahoveci, po përgatitet për sfidën e madhe të rrethit të tretë të Kupës së Evropës në hendboll.
Lideri i kampionatit tonë është në formën më të mirë dhe synojnë të dalin me rezultat pozitiv në përballje me ekipin rumun, CS Minaur Baia Mare.
Kryesia e KH Rahovecit i ka bërë të gjtiha përgatitjet në mënyrën më të mirë të mundshme për ndeshjen shumë të rëndësishme, me pikësynim që të janë shembull i organizimit, dhe në anën tjetër të bëjnë histori me kualifikim në të tetën e finales.
Ballafaqimi i parë luhet të shtunën në mbrëmje (19.00) në palestrën e sportit “Mizahir Isma” në Rahovec, ku po mbretëron një interesim i madh nga tifozët për të pa këtë sfidë jetike për kampionin tonë.
Hendbollisti më i mirë në Kosovë, Egzon Gjuka, shpreh optimizmin se me ekipin e tij, Rahovecin, do të ia dalin sa më mirë në përballje me CS Minaur Baia Mare-n.
“Përgatitjet për këtë ndeshje kanë filluar qysh momentin kur e kemi mësuar kundërshtarin, kemi arritur të sigurojmë disa ndeshje të tyre dhe kemi analizuar lojën e tyre”, - thotë Gjuka për gazetën kombëtare “Bota sot”.
Reprezentuesi i Kosovës ka treguar se ku i kanë edhe përparësitë ndaj rivalit: “Përparësitë për ndeshjen e parë besoj që do të jenë pikë së pari publiku, e cili ka qenë fantastik në ndeshjen e kaluar europiane e njëjtë besoj se do të jenë edhe të shtunën mbrema.
Ndërsa përparësi tjetër në fushë besoj që do të jetë loja e shpejt ekipore të cilën e aplikojmë si skuadër”.
Sa i përket ekipit rumun, Gjuka thotë se është i njohur në garat evropiane.
“Baia Mare është nje ekip i njohur në arenën ndërkombëtare, pasi që viteve të fundit ka arritur rezultate të mira, po ashtu këtë vit përbëhet me lojtar cilësor nga Rumania dhe shtetet tjera, gjë që e bënë të jetë favorit ndaj nesh.
Por, ne nuk do futemi me flamur të bardhë në keto ndeshje, së pari do të japim gjithçka nga vetja që në Kosovë të shënojmë fitore dhe të udhëtojmë për Rumani për ta mbrojtur atë fitore”, ka përfunduar Gjuka.
