Me ndeshjet e xhiros së 14-të përfundon stinori vjeshtor në Superligën e Kosovës në hendboll në konkurrencë të meshkujve.
Ndeshjet e kësaj xhiroje janë të mërkurën e të enjten.
Të mërkurën prej orës 20:00 në Shtime luhet takimi Vjosa – Prishtina. Kjo njëherit pritet të jetë ndeshja më interesante.
Vjosa është e gjashta me tetë pikë, por ka pretendime për pozitë dukshëm më të lartë. Ndërkohë Prishtina është e katërta me 14 pikë. Ka mbetur prapa Rahovecit, Besa Famgasit e Kastriotit, por ka bërë shkëputje të madhe pikësh me Vushtrrinë, Vjosën e Llapin.
Tri ndeshjet tjera janë të enjten. Nga ora 18:30 është takimi Trepça – Kastrioti. Në ora 19:00 fillon ndeshja Llapi – Rahoveci, derisa prej orës 20:00 takohen Vushtrria e Besa Famgasi.
Rahoveci është lider me 26 pikë. Besa e Kastrioti i kanë nga 20. Pason Prishtina e pas saj janë Vushtrria, Vjosa e Llapi me nga tetë pikë. E fundit është Trepça.
