Të shtunën në Prishtinë është zhvilluar seminari për gjyqtarët dhe vëzhguesit e hendbollit kosovar.
Ishte ky seminari qendror në prag të stinorit pranveror, i organizuar nga Shoqata e Gjyqtarëve të Hendbollit të Kosovës në bashkëpunim me Federatën e Hendbollit të Kosovës.
Seminari u mbajt në Hotel International Prishtina, ndërsa ligjërues ishte eksperti i njohur i Federatës Evropiane të Hendbollit, kroati Boris Milosheviq.
Janë trajtuar tema të ndryshme, për: detyrat dhe përgjegjësit e vëzhguesit në ndeshje dhe punën e vëzhguesve me gjyqtarët e rinj; menaxhimin e ndeshjes dhe ndëshkimet progresive; përparësinë në lojë dhe lojën pasive; shtatëmetërshin dhe faulet në sulm; hapat në hendboll; kartonin e kuq dhe kartonin e kaltë.
Me diskutimet e tyre konstruktive dhe me pyetjet e parashtruara, gjyqtarët dhe vëzhguesit tanë kanë kontribuuar që seminari të jetë shumë i suksesshëm.
