Pyetje: I nderuari Zoti Ali Topalli, drejtoni Drejtorinë për Kulturë, Rini dhe Sport në Komunën e Fushë Kosovës. A mund të na tregoni se cilat janë të arriturat dhe sfidat që përcollën jetën kulturore vitin që kaloi në komunën tuaj?
Ali Topalli: Viti 2024 ishte një vit i mbarë por edhe sfidues për Drejtorinë për Kulturë, Rini dhe Sport. Kur them i mbarë mendoj në realizimin e një varg aktivitetesh në kulturë, rini dhe sport si dhe në realizimin e disa projekteve infrastrukturore shumë të rëndësishme në sport.
Po përmendim vetëm disa nga to: përfundimi i fazës së parë të renovimit të stadiumit të qytetit, përfundimi i renovimit të sallave të sportit në Miradi të Epërme, Vragoli, Mesbardh, Lismir dhe Fushë Kosovë.
Vazhdimi i punimeve në palestrën e sporteve në Sllatinë përkatësisht te kompleksi i Pishave, ku pritet që ky projekt gjigant të përfundoj në vitin 2025.
Pyetje :Thuhet me të drejtë se kultura është ambasadorja më e denjë e një kombi. Cili është trajtimi që i bëhet kulturës qoftë në nivel komunal apo edhe atë qendror?
Ali Topalli: Thënë të drejtën Komuna e Fushë Kosovës, këto vitet e fundit ka pasë një fokus të veçantë në fushën e kulturës si tërësi duke na përfaqësuar në aktivitete të rangut kombëtar e ndërkombëtar. Mendimi im i përgjithshëm është se kultura si tërësi duhet të ketë një vëmendje më të madhe dhe më me prioritet.
Pyetje: Komuna e Fushë Kosovës, njihet edhe për disa vendbanime arkeologjike. Sa është investuar në këtë drejtim dhe cilat janë rezultatet e hulumtimeve arkeologjike?
Ali Topalli: Komuna e Fushë Kosovës ka bë evidentimin e 23 pikave arkeologjike në gjithë territorin e sajë. Harta arkeologjike ekziston dhe tani përveç kalasë së Harilaqit në të cilën janë bë investime në pikat tjera ende jo por që kjo nuk do të thotë se një ditë edhe aty të fillojnë gërmimet.
Pyetje: Po në fushën e librit? Sa përkrahën krijuesit e rinj dhe të gjithë ata që kanë pasion artin e fjalës?
Ali Topalli: Për çdo vit ne subvencionojmë dhe mbështesim por edhe i inkurajojmë botuesit e rinj. Kemi një numër të konsiderueshëm të krijuesëve të rinj që kanë përfituar dhe kanë nxjerrë për botim libra me prozë, poezi roman etj.
Pyetje:Sa janë përkrahur piktorët e rinj, si dhe muzicientët dhe festivalet në komunën e Fushë Kosovës?
Është një përkrahje solide do të thosha mundësitë janë të hapura dhe ato po shfrytëzohen mirë nga piktorët dhe muzicientët. Për këtë kemi edhe pjesëmarrje masive në festivale qofshin ato të muzikës me zhanre të ndryshme qoftë në festivale të pikturës.
Pyetje: Sa jeni të kënaqur me realizimin e planifikimeve të bëra për vitin që po e lëmë pas? A ka diçka që ka mbetur pa u realizuar dhe pa u thënë në këtë intervistë?
Ali Topalli: Sigurisht se do të donim që më shumë të kemi rezultate por që planin tonë të punës për vitin 2024 thuaj se e kemi të përmbushur.
Pyetje: Cili është mesazhi juaj për artdashësit dhe drejtuesit e institucioneve të kulturës?
Ali Topalli: Mesazhi im për gjithë komunitetin kulturorë e sportiv është: punoni fort, për të mirën tuaj dhe të komunitetit, sepse mbështetja dhe përkrahja institucionale nuk do të ju mungoj.
