Vaji i ullirit ka përfitime të shumta shëndetësore dhe shpesh theksohet si një simbol i të ushqyerit të shëndetshëm. Është një përbërës kyç në dietën mesdhetare, e cila konsiderohet si një nga dietat më të shëndetshme.
Sipas një studimi shkencor, i cili analizoi profilet ushqyese të 32 vajrave ushqimorë, vaji i ullirit spikati në vend të parë falë përqendrimit më të lartë të lëndëve ushqyese.
Dietologu Alex Larson thekson se vaji i ullirit përmban një bollëk yndyrnash të pangopura, të njohura për efektet e tyre të dobishme në shëndetin e zemrës. Përveç kësaj, ai është i pasur me antioksidantë si polifenole dhe vitaminë E, të cilat ndihmojnë në luftimin e inflamacionit dhe stresit oksidativ, faktorë kryesorë në zhvillimin e sëmundjeve kronike.
Pesë përfitimet kryesore shëndetësore të konsumimit të rregullt të vajit të ullirit
Vaji i ullirit është një burim i pasur me antioksidantë dhe yndyrna të pangopura, por është e rëndësishme të kuptoni saktësisht se si i sjell dobi trupit. Zbuloni më poshtë disa përfitime shëndetësore të konsumimit të rregullt të vajit të ullirit, shkruan Index.hr.
Ul kolesterolin
Polifenolet dhe yndyrat e pangopura në vajin e ullirit ndihmojnë në rritjen e kolesterolit HDL (të mirë) dhe zvogëlojnë rrezikun e sëmundjeve kardiovaskulare, tha dietologia Jennifer Hanes.
Promovon ngopjen
Shtimi i vajit të ullirit në vakte, si sallatat apo perimet, ruan ngopjen dhe ndihmon në kontrollin e peshës, ndërkohë që përmirëson përthithjen e vitaminave të tretshme në yndyrë, shpjegon Larson.
Përmirëson tretjen
Vaji i ullirit vepron si një laksativ i butë, mbështet shëndetin e zorrëve, rrit bakteret e mira dhe ul rrezikun e kancerit të zorrës së trashë, shkruan Parade.
Redukton rrezikun e kancerit
Antioksidantët në vajin e ullirit reduktojnë inflamacionin, i cili ndihmon në parandalimin e disa llojeve të kancerit, si kanceri i gjirit, i rrugëve të sipërme të frymëmarrjes dhe i traktit urinar. “Vetitë anti-inflamatore të vajit të ullirit ekstra të virgjër mund të zvogëlojnë simptomat e sëmundjes inflamatore të zorrëve, artritit reumatoid dhe rreziqet e diabetit, sëmundjeve të zemrës dhe goditjes në tru,” shpjegon Hanes.
Mbron trurin
Vaji i ullirit mund të zvogëlojë rrezikun e demencës. Falë yndyrave dhe antioksidantëve të tij të shëndetshëm, vaji i ullirit redukton inflamacionin, mbron nga rënia kognitive dhe ndihmon në zbutjen e simptomave të depresionit dhe ankthit.
