Një studim shkencor nga Universiteti i Oksfordit ka zbuluar se disa zgjedhje dietale dhe stili i jetesës mund të ndikojnë ndjeshëm në jetëgjatësinë, ndërsa gjenetika luan një rol më të vogël nga sa mendohej më parë.
Pas analizimit të 164 faktorëve mjedisorë, studiuesit zbuluan se vetëm një ushqim lidhej me një jetë më të gjatë – djathi. Edhe pse shpesh konsiderohet si një ushqim i pashëndetshëm, djathi rezultoi të ishte një përjashtim, ndërsa as mishi, kripa apo perimet nuk ishin të lidhura drejtpërdrejt me zgjatjen e jetëgjatësisë.
Edhe pse shkencëtarët nuk specifikojnë një lloj të caktuar djathi, dietologët zakonisht rekomandojnë varietete më të shëndetshme si gjiza, rikota, feta dhe djathi i dhisë, të cilat janë të pasura me proteina dhe kalcium dhe kanë një përmbajtje më të ulët të yndyrës së ngopur në krahasim me disa djathëra të përpunuar, shkruan Index.hr.
Studimi tregoi gjithashtu se mënyra e jetesës ndikon në shëndetin dhe plakjen deri në dhjetë herë më shumë sesa gjenetika. Faktorë të tillë si aktiviteti fizik, niveli arsimor dhe punësimi kontribuojnë ndjeshëm në një jetë më të gjatë. Profesoresha Cornelia van Duijn, një nga autorët e studimit dhe një epidemiologe, shpjegoi: “Konsumimi i djathit është i lidhur me statusin socio-ekonomik” dhe theksoi se studimi nuk sugjeron që dieta është e parëndësishme, transmeton Daily Express.
