Në Ditën Ndërkombëtare të Fëmijëve, është përuruar edhe një çerdhe për fëmijë në Ratkoc të Rahovecit. Kjo çerdhe ka kapacitet për rreth 180 fëmijë, objekt i cili ka kushtuar më shumë se 508 mijë euro.
Kryetari i Rahovecit, Smajl Latifi tha se përurimi i një çerdheje është vepër e mirë, meqë fëmijët janë e ardhmja e vendit.
"I uroj të gjithë fëmijët në rastin e ditës ndërkombëtare të fëmijëve, pra 1 qershorin. E di që janë të gëzuar dhe e di qe duhet të jenë të gëzuar çdo ditë, jo vetëm me 1 qershor. Sot është lajm i mirë qe po e përurojmë edhe çerdhen e fëmijëve këtu në Ratkoc. Nga Krusha erdhëm në Ratkoc për ta përuruar edhe ketu çerdhen për fëmijë... Përurimi i një çerdheje është vepër e mirë, është vepër e rëndësishme jo vetëm për fëmijët, por për të gjithë ne. Sepse këta janë e ardhmja jonë", ka thënë Latifi.
Drejtori i Arsimit në Komunën e Rahovecit, Avni Morina ka thënë se çerdhja përmban dy mensa, dhomë gjumi me 27 shtretër, zyrën e mjekut, psikologut dhe të udhëheqësve të saj.
"Vlera për ndërtimin e këtij objekti të çerdhes është 508 mijë, e 260 euro e 43 cent. Kjo çerdhe përmban 3 klasa për grupmoshat 2 deri në 3 vjeç, me gjithsej 82 fëmijë. Katër klasa për grupmoshat 4 deri në 5 vjeç, me gjithsej 94 fëmijë. Kur i mbledhim së bashku, i bie që në këtë çerdhe mund të sistemohen sipas grupmoshave 176 fëmijë, prej moshës nëntë mujore deri në pesë-vjeçare", ka njoftuar ai.
Ai i ka bërë thirrje Ministrisë së Arsimit për furnizim me inventarë.
"Këto ditë po e presim furnizimin me inventarë të tri çerdheve, për të cilat e ka detyrë Ministria e Arsimit. Qysh nga prilli i vitit të kaluar, drejtoria komunale për arsim dhe komuna jonë kemi adresuar kërkesën me të gjitha specifikat e nevojshme për pajisje e këtyre çerdheve me kuzhinë, shtetër, me banka, karrige dhe gjithë inventarin e nevojshëm për furnizim që duhet për t'i vënë në funksion këto çerdhe. Po presim gjatë këtij muaji, të paktën ashtu na është thënë nga Ministria e Arsimit, që të bëhet furnizimi me inventarë dhe sapo të kompletohet ne do të jemi të gatshëm të fillojmë me funksionalizimin e kësaj çerdhe", ka shtuar ai.
Ai ka thënë se kanë hapur konkurs për 16 edukatore për çerdhen në Krushë të Madhe, Xërxë dhe Ratkoc.
